'XX. mendeko arkitektura Espainian, Gibraltarren eta Frantziako Akitania, Auvernia, Languedoc-Rousillon, Limousin, Midi-Pyrénées eta Poitou-Charenteseko eskualdeetan' proiektua honako lau erakundeen ekimenari esker abiatu zen: Docomomo Ibérico Fundazioa, arc en rêve centre d'architecture, Gibraltarreko Gobernuko Hirigintza Saila eta Mies van der Rohe Fundazioa; horiei gehitu zitzaizkien gero, partaide elkartu gisa, Arquia Fundazioa eta Ordem dos Arquitectos de Portugal.
Espainiako, Gibraltarreko eta 'Sudoe' deitzen den barrutian sartutako eskualde frantsesetako XX. mendeko ondare arkitektonikoa inbentariatzea zen proiektuaren helburu orokorra. Europar Batasunak erabiltzen duen terminoa da 'Sudoe', Iberiar penintsulak eta aipatutako eskualdeek osatzen duten lurralde-eremua izendatzeko.
Europar Batzordeko Eskualde Garapenerako Europako Funtsaren (FEDER) Hego Mendebaldeko Ekimen Komunitarioko INTERREG III (SUDOE) proposamenen bigarren deialdian (2004) onartu zen proiektua. Funts ekonomiko horri, eta Mies van der Rohe Fundazioak, Docomomo Fundazioak eta Arquia Fundazioak emandako aldi bereko finantziazioari esker gauzatu zen proiektua: Internetetik kontsulta daitekeen datu-base bat, CD-ROM formatuko argitalpen bat eta erakusketa bat.
Arquia Fundazioak erabiltzaileen esku jartzen du orain 'Arch XX SUDOE España' artxiboari dagokion datu-basea.
Iingelesezko "Documentation and Conservation of buildings, sites and neighbourhoods of the Modern Movement" delakoaren siglak dira DOCOMOMO, eta 1990ean sortu zen Nazioarteko DOCOMOMO Erakundeari dagozkio. Egun, Bartzelonan dauka egoitza erakundeak.
Mugimendu modernoaren arkitektura-ondarea inbentariatu, zabaldu eta babesteko helburu nagusiarekin, estrategia geografikoa zehaztu du erakundeak, eta hortik eratu da Docomomo Ibérico Fundazioa. Bartzelonan dauka egoitza egun, eta koordinazio-lana egiten du, helburu horiek Espainian eta Portugalen bete daitezen.
Mugimendu Modernoaren Dokumentazioa eta Kontserbazioa Proiektua (DOCOMOMO) Iberiar penintsulako lurralde-esparruan ari da gauzatzen, askotariko erakunde eta instituzioen kolaborazioari esker, baina, bereziki: arkitektura-elkargoak, ondare-institutuak eta arkitekturaren dibulgazio eta ezagutzan ari diren erakundeak. Fundatu zenetik, DOCOMOMO Ibérico Fundazioak hainbat ekimen abiatu ditu Iberiar penintsulan ondare modernoa dokumentatu eta ikertzeko. Lan hori zenbait argitalpen, mintegi eta biltzarretan gauzatu da.
Bartzelonako Udalak sortu zuen Mies van der Rohe Fundazioa 1983. urtean, hasierako helburu batekin: Ludwig Mies van der Rohek (1886-1969) Bartzelonako Nazioarteko erakusketarako (1929) diseinatutako Alemaniako Pabiloia berreraikitzea.
Mies van der Rohe Pabiloia zaindu eta ezagutzera emateaz gain, arkitektura eta hirigintza garaikideko gaiei buruzko eztabaida, hedapena eta sentsibilizazioa sustatzen ditu Fundazioak. Ludwig Mies van der Roheren obraren eta mugimendu modernoaren azterketa ere bultzatzen ditu. Helburu horiek oinarri hartuta, hainbat sari, biltzar, hitzaldi, erakusketa, tailer eta instalazio antolatzen ditu Fundazioak.
Programa horien artean, Europar Batasuneko Arkitektura Garaikideko Saria - Mies van der Rohe Saria nabarmentzen da, Europako Batzordearekin batera antolatzen dena eta Europako arkitektura-sari prestigiotsuenetakoa dena.
Arquia Fundazioa kultura-fundazio pribatu gisa eratu zen 1990eko maiatzaren 23an, arkitekturaren, eraikuntzaren, diseinuaren eta hirigintzaren esparruko izaera kulturaleko jarduerak eta, oro har, arkitektoen jardunari lotutako aspektu oro sustatu eta bultzatzeko.
Arkitektoen Kutxako hezkuntza eta sustapenerako funtsetatik jasotzen dituen baliabideak kudeatzen ditu, eta baita bere ondare-produktuetatik eta jardueretako batzuetan egindako inbertsioen berreskuratzetik lortzen dituenak ere.
Patronatuari dagokio Fundazioaren ordezkaritza, gobernantza eta administrazioa. Patronatua Arkitektoen Kutxako batzorde zuzentzaileko unean-uneko kideek osatzen dut, eta baita zuzendari nagusiak ere.
