É un documental sobre a escola de arte e deseño probablemente máis coñecida da modernidade. Os seus produtos «estilo Bauhaus» responden a un deseño estilizado, funcional e moderno. Os profesores que percorreron as súas aulas recibiron recoñecemento internacional: Paul Klee, Wassily Kandinsky, Lyonel Feininger, Walter Gropius, Mies van der Rohe ou Marcel Breuer. O seu sistema pedagóxico co «curso preliminar» e o ensino aplicado en obradoiros, que instauraron Johannes Itten, László Moholy-Nagy ou Josef Albers, foi adoptado en multitude de escolas.
No entanto, a historia da Bauhaus é unha historia de incomprensións e dificultades. Admirada e defendida por artistas e intelectuais de todas as partes do mundo, foi rexeitada e atacada mordazmente polo poder político e os habitantes onde tivo as súas sedes, Weimar e Dessau. Emparentada co deseño industrial funcional, as súas orixes estiveron intimamente unidas ao expresionismo e á produción artesanal baixo o modelo dos gremios medievais para implicarse progresivamente na produción industrial e, finalmente, na arquitectura. Os seus tres directores, Walter Gropius, Hannes Meyer e Mies van der Rohe, protagonizaron, en certo modo, estes momentos da súa historia.
Libreto da edición a cargo do arquitecto Jorge Torres Cueco, profesor catedrático da Universitat Politècnica de València. Autor da publicación Le Corbusier: visiones de la técnica en cinco tiempos (Fundación Arquia, 2004).
