Emprendemento Social 2017

Cremos en proxectos con gran potencial que deben cumprir os seguintes criterios:

• Orixinalidade da idea de negocio: debe ser unha idea creativa e innovadora que achegue un novo enfoque de traballo e que contribúa de maneira significativa no ámbito social.

• A idea de negocio deberá contar cunha estrutura clara, ordenada e lexible, así como estar baseada nunha oportunidade de mercado con potencial suficiente de monetización.

• Modelo de negocio innovador con alta capacidade de xeración de valor e un gran potencial de crecemento.

• O proxecto deberá permitir unha inserción viable no mercado: obxectivos claros e realistas, definición de estratexias e recursos necesarios para levalo á práctica, unha planificación estudada e un orzamento detallado.

• Capacidade e liderado do emprendedor ou equipo emprendedor: cómpre posuír cualificacións e coñecementos sólidos e débense demostrar competencias para levar a cabo o proxecto con éxito.

A bolsa inclúe unha praza no Programa de Emprendemento Social de Barcelona Activa que consiste en sesións repartidas unha vez á semana durante 6 meses que inclúen formación para a elaboración do plan de empresa, para a capacitación en habilidades emprendedoras, titorías de seguimento e experiencias emprendedoras.

Aparte dos servizos e recursos de Barcelona Activa, a Fundación Arquia pon a disposición dos emprendedores bolseiros dende o primeiro día, un (1) asesor de recoñecido prestixio na xestión do desenvolvemento profesional relacionado co ámbito Arquitectura, que titorizará ao bolseiro durante todo o proxecto mediante sesións presenciais e en liña. Esta titorización estará orientada á toma de decisións e guiaraos durante todo o proceso de elaboración do plan de empresa e análise da súa viabilidade. Tamén proporcionará ao bolseiro, dentro das súas posibilidades, os contactos e a información que requirirá para traballar no seu proxecto empresarial con éxito. Nesta edición corresponde a Mónica Bonafonte, directora da Escola Sert do COAC, a titorización do bolseiro.

Co obxectivo de equiparar as oportunidades de participación a nivel territorial, a Fundación Arquia subvencionará ao bolseiro cunha dotación económica de 7.000 euros como axuda en gastos de desprazamento que lle permitan trasladarse para asistir a todas as sesións en Barcelona Activa e, a parte do seu equipo, ás sesións de acompañamento se consideran que é necesario.

A Fundación Arquia proporcionará cobertura ao bolseiro nos termos da póliza de asistencia en viaxe contratada a través da axencia de seguros Arquiseguros.