PENITENCIA!

PENITENCIA!

Nun momento delicado para a imaxe social da nosa profesión, reflexionar sobre como chegou a ser partícipe imprescindible do gran espolio inmobiliario pode ser un bo aviso para aqueles que aspiran a incorporarse a ela. Sabemos do potencial da arquitectura para mellorar o mundo e crear maneiras diversas de estar nel, e sabemos tamén do seu potencial inverso en mans enfermas, capaces de esnaquizar os nosos modos de vida e paisaxes. Coñecendo xa a cadea de personaxes implicados no derrube da nosa economía e o «Gran Timo» social, imos imaxinar unha arquitectura contraditoria capaz de activar o mellor da paisaxe e que sirva á vez de sitio de penitencia para os seus usuarios. Atónitos ante a impunidade que demostran coa xustiza do noso país, os implicados serán enviados a un lugar de xustiza máis avanzada e de clima extremo para que reflexionen sobre os seus excesos.