Los Ángeles

Los Ángeles

10 Paradigmas

A elección mostra dez casas capaces de representar un modo de habitar, de entender a cidade e de cooperar coa súa construción, de construír o espazo e de entender a función da arquitectura e, mesmo, a misión do arquitecto. Represéntanse as diferentes vocacións da arquitectura de Los Ángeles, tanto as obras máis afastadas do estilo internacional como aqueloutras interpretacións da modernidade máis difundidas pola historiografía moderna e, presumiblemente, máis próximas ao observador da exposición. Son obras dos arquitectos Greene, Irving Gill, R. M. Schindler, R. Neutra, Gregory Ain, os Eames, A. Quincy Jones, Craig Ellwood, Albert Frey ou John Lautner.

A exposición móstrase como a propia cidade de Los Ángeles: un mosaico de fenómenos individuais conscientes da súa repercusión xeográfica, construído mediante a adición de paisaxes heteroxéneas, en ocasións opostas e mesmo en loita contra a súa contorna física e política. A cidade móstrase a través dunha representación parcial dunha selección infinitésima das súas paisaxes. E, coa cidade, móstrase unha pluralidade de arquitecturas modernas, que poñen de manifesto a capacidade transformadora e propositiva (non sempre exercitada) da arquitectura do noso momento.

É, en definitiva, unha mostra que confía na posibilidade cultural e transformadora da arquitectura.